Гадаад улсад ур чадвар эзэмшсэн иргэдийн хөдөлмөр эрхлэлтийг дэмжих өдөрлөгийг зохион байгуулах гэж байна.

2020 оны 10 дугаар сарын 22-ны өдрийн 10:00-15:00 цагт Нийслэлийн Үйлчилгээний нэгдсэн төвийн Дүнжингарав салбарт БНСУ-д хөдөлмөрийн гэрээгээ амжилттай дуусгаж, суугаа орны дэвшилтэт технологиос суралцан ур чадвар эзэмшиж, нутаг буцаж ирсэн иргэдийн хөдөлмөр эрхлэлтийг дэмжих, гадаадад ажиллах хүч гаргах үйл ажиллагаа, хөдөлмөр эрхлэлтийг дэмжих чиглэлээр төрөөс авч хэрэгжүүлж буй бодлого, арга хэмжээг иргэд, олон нийтэд сурталчлан таниулах, хөдөлмөр эрхлэлтийг дэмжих үйлчилгээнд хамруулахад чиглэсэн өдөрлөгийг зохион байгуулах гэж байна.

Тус үйл ажиллагаанд Нийслэлийн Баянгол, Хан-Уул, Баянзүрх, Сонгинохайрхан, Чингэлтэй, Сүхбаатар дүүргийн Хөдөлмөр, халамжийн үйлчилгээний хэлтэс, Мэргэжлийн боловсрол, сургалт, үнэлгээ мэдээлэл, арга зүйн төв, МЗХ-ны дэргэдэх залуучуудын хөдөлмөрийн бирж, ажил олгогч аж ахуйн нэгж байгууллагууд оролцох юм.

Өдөрлөгийн үеэр Гадаадад ажиллах хүч гаргах үйл ажиллагаа, хөдөлмөр эрхлэлтийг дэмжих чиглэлээр төрөөс авч хэрэгжүүлж буй бодлого, үйл ажиллагааны талаар иргэд, аж ахуй нэгж байгууллагуудад танилцуулах, сурталчлах, салбарын хөдөлмөр эрхлэлтийг дэмжих чиглэлээр хэрэгжиж буй төсөл хөтөлбөр, үйлчилгээ, арга хэмжээ болон хөдөлмөрлөх эрхийн талаар иргэдэд мэдээлэл зөвлөгөө өгөх, сурталчлан таниулах, зөвлөмж, зурагт хуудас, хэвлэмэл материал түгээх, иргэдийн санал хүсэлтийг хүлээн авах чиглэлээр видео дуудлага, нээлттэй утас болон саналын хайрцаг, ажлын ярилцлага хийх тусгай өрөө ажиллуулах, иргэдэд нээлттэй ажлын байрын захиалгыг танилцуулах, ажилд зуучлах, бүртгэл мэдээллийн үйлчилгээг зохион байгуулах, иргэний өмнөх мэдлэг ур чадварыг үнэлэх, гэрчилгээ олгох ажил, үйлчилгээг танилцуулах, бүртгэлд хамруулах ажлууд тус тус зохион байгуулагдана.

Ерөнхий зохион байгуулагч:

• Хөдөлмөр, халамжийн үйлчилгээний ерөнхий газар;

Хамтран зохион байгуулагч:

• Бүгд Найрамдах Солонгос Улсын Аж үйлдвэрийн хүний нөөцийн хэрэг эрхлэх газрын Монгол Улс дахь И Пи Эс Төв;

• Нийслэлийн Хөдөлмөр эрхлэлтийн газар;

Холбоо барих:
7712-1285
11-310949
75111896