Нийтийг хамарсан ажилд хамрагдсан иргэд цагийн 5000 төгрөгийн хөлстэй ажиллана

ХНХЯ-ны сайдын 2017 оны 07 дугаар сарын 17-ны өдрийн А/124 дугаар тушаалаар байгалийн гамшиг тохиолдсон нутаг дэвсгэрт нийтийг хамарсан ажил зохион байгуулахаар боллоо.

Монгол Улсын Засгийн газрын тухай хуулийн 24-р зүйлийн 24.2 дахь, Хөдөлмөр эрхлэлтийг дэмжих тухай хуулийн 14.5 дахь заалтыг тус тус үндэслэн байгалийн гамшиг, давагдашгүй хүчний шинжтэй нөхцөл байдлын улмаас учирсан хохирлыг арилгахад нийтийг хамарсан ажил зохион байгуулах арга хэмжээг хэрэгжүүлэх зорилготой. Ингэхдээ байгалийн гамшиг, давагдашгүй хүчний шинжтэй нөхцөл байдалд учирсан хор уршгийг арилгах, нөхөн сэргээх зорилгоор нийтийг хамарсан ажлын нэг цагийн хөлсийг 5000 /таван мянган/ төгрөгөөр тогтоохоор тушаалд тусгасан байна.

Хөтөлбөрт хамрагдсан иргэд ОБЕГ-ын удирдлаганд ажиллах юм. Мөн нийтийг хамарсан ажлыг зохион байгуулах нарийвчилсан төсөв гаргасан байна.