Коллеж, МСҮТ-ийн сурагч, оюутанд нийтийн тээврийн цахим карт олгох, сунгах ажил эхэллээ

Хичээлийн шинэ жилтэй холбогдуулан оюутан, сурагчдын автобусаар зорчих картыг хэрхэн шинээр олгох, сунгах  талаар Нийслэлийн Хөдөлмөр Эрхлэлтийн газар, Нийслэлийн боловсролын газар, “Улаанбаатар смарт карт” ХХК-иас мэдээлэл хийлээ.

Нийслэлийн иргэдийн Төлөөлөгчдийн Хурлын 2015 оны 6/21 тоот тогтоолоор Нийслэлийн Хөдөлмөр эрхлэлтийн газар нь УБ Смарт карт болон Нийслэлийн Тээврийн газартай хамтран гурав дахь жилдээ оюутны автобусаар хөнгөлөлттэй зорчих карт түгээлт хийх ажлыг зохион байгуулж байна. 2016-2017 оны хичээлийн жилд нийслэлийн 32 МСҮТ, Коллежийн захиалгийг нийтдээ 13,000 гаруй оюутан суралцсанаас 12,700 гаруй оюутанд картыг олгосон. Энэ жилийн хувьд 2017.09.01-ээс сүүлийн байдлаар тоон мэдээ нэгтгэгдэж ойролцоогоор өмнөх жилийнхтэй адил 13,000 гаруй оюутаны картыг сунгах, шинээр олгох чиглэлээр Нийслэлийн Хөдөлмөрийн эрхлэлтийн газар журмын дагуу ажиллана.

2017-2018 оны хичээлийн жилд шинээр их, дээд сургуульд орж байгаа оюутнуудад цахим төлбөрийн картыг анх удаа олгох ажил байгаа. 2017 оны наймдугаар сарын 21-25-нд оюутнууд өөрийн сургуульдаа цахим төлбөрийн карт авах мэдүүлгээ бөглөнө.

Их, дээд сургуулиуд оюутнуудынхаа мэдээллийг нэгтгэн, Нийслэлийн боловсролын газарт хүргүүлнэ. Тус газарт 28-30-ны хооронд идэвхжүүлээд, сургуулиудад нь хүргэнэ. Их, сургуулиуд есдүгээр сарын 1-5-нд автобусаар зорчих картыг нь оюутнууддаа олгох юм байна.

Нийтийн тээврийн төлбөрийн цахим картыг сунгах тухайд шинэ оюутнуудын захиалгатай адил хугацаатай. Харин уг картыг дахин олгох хугацаа есдүгээр 01-нээс 8-ны өдрүүдэд хийгдэнэ. Их дээд сургуулиуд есдүгээр сарын 08-наас 15-ны өдрүүдэд карт дахин захиалах хүсэлтийг НБГ-т ирүүлнэ. Энэхүү хүсэлтийг бид шалгаж үзээд есдүгээр сарын 15-21-ны өдрүүдэд цахим картыг дахин олгоно.

          “Улаанбаатар смарт карт” ХХК-ийн үйл ажиллагааны хэлтсийн дарга Ц.Түвшинжаргал 

           “Ub smart bus нэртэй аппликэйшныг татаж аваад автобусны чиглэл болон карт цэнэглэх борлуулах цэгүүдийн мэдээллийг зэргийг авах боломжтой. Оюутны цахим карт сунгах ажил тодорхой цаг хугацаанд хийгддэг ажил учраас оюутнууд маань хугацаандаа багтаад сургалтын албандаа өргөдлөө өгөхийг хүсч байна” гэлээ.